& مع فلوران ود ام فلوران اذا تزرعنا بالصبر الجميل وبارينا درب العلمية والمنهجية مع مورينهو افريفيا حتما سنصل لمحطة الهلال غالب كم ليس علي صعيد مباريات الممتاز بل دوري ابطال افريقيا وكيف لا وبالهلال الان الغربال الجمال والجمال الغربال والموسيقار جارجو الرهيف الحريف وفنان الشعب  روفا والسد العالي فيكتور والقاطرة البشرية ليليبو وبقية الفريق والتيم الحديد والشاهد ان كل يوم جديد يحمل معه بشرى جديدة وعندما يكون لديك داهية كما فلوران ومجلس يعرف كيفية التعامل معه وموهوبين كثر من حقك وبعد مرحلة الصبر الجميل ان تشطح وتنطح في طموحاتك الناطحة سحاب شفتوا كيف.. ؟؟؟ 
& تفاءلوا بالخير يا اهلة وبالصبر علي الداهية الكنغولي يمكن ان نحصد  َالكثير من الثمار حلوة المذااااااق ولاننا ننتمي للحبور هلال الجمال والجمال الهلال من الليلة صرة الوش مامعانا عندنا  جوهرة تسر العين والباقين مساكين استاد صالح للمبار يات ماعندهم  عندنا مجلس مؤمن بالقضية قادنا للعولمة الكروية ولسه هم لافين صينية مابين سودكال وحازم وابو جيبين، ومدربنا قيمة وقامة ومدربهم رايح جاي يلقاها من السقف المنخفض ولا عدم الاستقرار الاداري عندنا لاعبين هم الاميز محليا وعندهم مجموعة من العاطلين عن الموهبة بقيادة نمر وكرشوم وبقية هواة الكبع واللبع وحتي نكون َمنصفين نستثني التش الفنان شفاه الله  والسَماني الصاوي والذي بدا يشيخ وفي كل صباح جديد يتضح ان الازرق جمع مجموعة من موهوبي ومحترفي الخارج وفي المقابل لم يفرز اسقف المنخفض غير بعض امل في كمبالي والاختلاف الجزري ان هلال الملايبن تقف خلف عولمته جمهور اغلبية غالبة وطاغية في الارض بالاضافة الي انه يمتلك فندق خاص وعدد من الافكار  الايجابية نعم الاحمر غير الوهاج عندو جمهور ولكنه اقلية بالمقارنة مع الشعب الازرق وطبعا الفريق الماعندو استاد يتمرن فيهو طبيعي مايكون عندو فندق...!!! 
& ولاجل المذكور انفا وغيره اتسع الفارق وبات  واضحا ان  المسافة بعيدة بعيدة  مابيننا وغيرنا واذا اردت معرفة الهوية والانتماء الرياضي للسودانيين في نص السوق العربي وهم ماشين وجايين فاذا قابلك شخص بهي الطلة خفيف الروح ظريف وبالرغم من حال البلد الواقف له ألقدرة علي الابتسامة ده هلالابي  وعلي النقيص تماما اذا شاهدت زول صاري وشو ومادي بوزو شبرين وماعارف  تمارين ومباريات فريقو وين  ماتقول  المدام معكنناهو  أو الفلس محرق روحو وهو ما مشوكش ولا حاجة ده ظلم نفسه بالانتماء لغير الحبور هسه في زول جاب سيرة الاثار السالبة لتشجيع المريخ هنا....؟؟؟ 
& وحقيقة فان مايحدث بالهلال من عولمة بات يمثل لنا راحة في عز التعب يعني اذا انت من سكان امدرمان او غيرها وفجاة دبرست  ماعارف تقبل وين  ماعليك الا وان تيمم وجهك صوب القلعة الزرقاء حيث الجوهرة المفخرة وتشاهد الحبيب الهلال اذا عندو تمرين او مباراة واذا مافي حاجة تتفرج علي جمال المفخرة وتمتع عيونك بالدهشة،  وبعدها عينك ماتشوف الا  تحريك ساكن الدواخل وجريان روح المرح والدعابة مجري الدم ولان الهلال عالم جميل سيفتر  ثغرك عن ابتسامة اولا وبعدها ستنخرط في نوبة قرقراب وترجع بيتكم بغيرالحالة التي  خرجت بها  وباذن الكريم مواسم الافراح الوردية الهلالية قادمة قادمة ومستمرة والبلد التي بها سحر الطبيعة  النيل العظيم واكسير الحياة الهلال  الجميل  وانجبت الراحل المقيم في الوجدان العملاق  وردي ََتستحق الفرح. 
اهداف سريعة.. اهداف سريعة 
& ولانه ابن السودان البار هلال المجد والفخار فان مهمة ان ينوم السواد الاعظم  من  الشعب السوداني علي وسادة  الحبور عشية الاحد مسؤلية  سيد البلد. 
& والكتيبة الزرقاء  بقيادة مورينهو القارة السمراء فلوران ود ام فلوران باذن الله في الموعد وياالشباب ارجي الراجيك هلالنا متحزم ومستنيك.  
& نريد معركة كروية جديدة تضاف لمعارك الازرق الخالدة ثلاثية القرن في شباك اهلي القرن، وريموونتادة المحلة المصري كما حدثنا التاريخ. 
& وبما ان جغرافية المكان هي مقبرة الخصوم الداخل اليها مهزوم والخارج منها مكلوم َمكلوم ياولدي. 
& عليه فان الشباب التنزاني يفترض ان يلقى نفس مصير داون داون صن داونز. 
& العولمة الهلالية الزرقاء الشقيقة الكبري للجوهرة الزرقاء تحمل مسارين هما.
& محطة حسد للبعض من جانب ومن اخري فانها نقطة انطلاقة للمتصالحين مع انفسهم من يحاولون اقتفاء اثر سيد البلد. 
& وكما قلنا سابقا فان وصافة الكبير الهلال ليست حصرية علي احد وبابها مفتوح لكل مجتهد سواء كان الوصيف الحالي او حيدوب النهود او هلال الساحل او اهلي الخرطوم ....!!! 
& ويظل الهلال الرقم الصحيح بالكرة السودانية وغيره الكسور والبواقي. 
& نتطلع لهلال قيافة فايت العرب والافارقة مسافة. 
& ازرق وابيض لون الفل هلال القمة حبيب الكل. 
& واخيرا احمد الله كثيرا انني حي ازرق.