& اكيد كلكم بتسالوا عوص ده منو وقصتو شنو وعلاقتو مع كالالا شنو وعشان نفك طلاسم كم شنو مذكورة انفا تعالوا نمشي سوا نحو اخر نكتة حقت المولد قالوا ولم نقل عوض مفلس شدييييد مرتو قالت ليو الجيران و ناس الحلة كلهم جابو حلاوة مولد الا أنا ما جبت لي ليه عوض قال ليها :اجيب حلاوة مولد لشنو والحلاوة جنبي انتي الحلاوة والعسل الفايتاهو حلاة.. مرتو لمن خجلت وقالت:خلاص يا عوض أنا أصلاً عندي وجع ضرس..
& ونعتقد بان النكتة اعلاه تشخص تماما حال المهاجم الخطيركالالا مع جَمهور وادارة نادي الشباب يقال انهم سالوه عقب التعادل المكسب في حسابات لاعبي ومدرب الفريق التنزاني بحسب مجريات الشوط الثاني  علي غرار سؤال عوض عن حلاوة المولد ياكالالا  ليه ماضوقتنا حلاوة الفوز علي الهلال بدار السلام فاجاب عوض اقصد كالالا انتوا لمن انا مامشيت الهلال في التسجيلات وهسه ندمان وسافي التراب فرحتوا صااااااح..؟؟؟ وكانت الاجابة  ايوه نعم صاااح .. وفي الاثناء  جمهور سيمبا يهتف للغربال الجمال والجمال الغربال..واردفهم بسؤال اخر ولمن انا جبت القون نططوا صاااااااح..؟؟ ايوه صاااح واردفهم بسوال تعسفي ثالث وبحسب ما اضاعه الهلال من فرص في الثلث الاخير التعادل مكسب طن بالنسبة لينا صاااااح.. اجابوا ايوه صااااح وعندها كل مشجع تنزاني شبابي  مسك ضرس العقل وطالبوا عوض اقصد كالالا بامر واحد فقط لاغير عارفنوا شنو...؟؟؟ اوريكم ليهو في الفقرة ادناه...!!! 
& طبعا مقبرة الخصوم الداخل اليها مصدوم والخارج منها مكلوم ومهزوم مهزوم ياولدي  والكلاَم ده معروف ومعلوم لكل القارة السمراء من زماااااان خالص عشان كده مطلب جمهور الشباب من عوض اقصد كالالا يدور في اطار نطاق السترة والعيبة متباريات يعني همهم الاساسي بقي الصمود والجود  بالموجود خارج الحدود مع منافس شرس جدا ماعندوش يمه ارحميني واذا كان المطلوب من كالالا ذلك المذكور اعلاه فان المطلوب َمن  (عوض حقنا) اقصد لاعبي الهلال اولا  الرد علي تطاول جمهور الشباب علي الهلال قبل مباراة الذهاب وثانيا دايرين حلاوة الانتصار وفرحت القلوب بالتاهل  رجالة حمرة عين لاننا نحتاج الفرح بشدة من اجل مقاومة اوجاع  ( ضرس الاوضاع السياسية المولمة) وبصراحة لا ولن نقبل من فرسان الهلال  سوى اسعاد الملايين في ملحمة الاحد الاغر باذن رب العالمين. 
& وعلي مجلس ادارة نادي الهلال ان يخبر فلوران ود ام فلوران مورينهو القارة السمراء وكل المحترفين الاجانب بان مثل هذه الايام ذكرى  المولد النبوي الشريف  َتحمل للاهلة  العديد من الذكريات الحلوة ومن ابرزها مباراة قمة ليلة الَمولد الشهيرة والتي  انتهت بهدف الاسطورة فتَم اطلاق حلاوة جكسا علي احدي عرائس حلاوة  المولد  حينها عليه فاننا في انتظار حلاوة الغربال، وحلاوة جارجو، حلاوة ليليبو وحلاوة مانو والاربعة انفا مقصودة من اجل الثار لفريق زعلان جوبا شفتوا كيف...؟؟؟ 
اهداف سريعة.. اهداف سريعة 
& اقتربنا من الوصول لمحطة ان كل لاعب بالتشكيلة الاساسية للهلال لديه منافس شرس. 
& فيما عدا محور الارض سنغوني وبرج المرافبة فيكتور نانكي والقاطرة الكنغولية ليليبو كل لاعب بديله جاهز. 
& نتمني سرعة شفاء  جيرارد فيردي لمزاحمة سنغوني وكذلك ارنق من اجل منافسة فيكتور والطيب بشدة. 
& وصدقوني فان احتمال اقتحام  الثنائي الشاب امجد قلق ومبارك الوادي لتشكيلة فلوران امر غير مستبعد. 
& وكما هو معلوم فان فريق البطولات لابد ان يصَم اساسيين علي اعلي مستوى وبدلاء ان لم يكنوا بنفس المستوى  اقل شوية. 
& وشخصيا افضل مشاركة لون الدم في معركة الاحد امام الشباب حتي يكمل مابدا بدار السلام. 
& وبمثلما تجاوز فوفانا مطب سان جورج فان ابو عشرين سيقودنا  باذن الله لعبور الشباب التنزاني. 
& برغم انف الاعلام السالب اس الداء والبلاء بالكرة  السودانية ومحاولاته اليائسة لاجهاضها
& فان العولمة الكروية الهلالية الزرقاء هي طوق النجاة للكرة السودانية من بحر الفشل والتاخر المتلاطم الامواج. 
& ويظل الهلال الرقم الصحيح بالكرة السودانية وغيره الكسور والبواقي 
& نتطلع لهلال قيافة  فايت العرب والافارقة مسافة 
& ازرق وابيض لون الفل هلال القمة حبيب الكل. 
& واخيرا احمد الله كثيرا انني حي ازرق.