وصلتني رسالتان في الخاص من شخص لا أعرفه حيث أن رقم هاتفه غير مسجل عندي وعلى ما يبدو أنه ( لبس الطاقية ) على طريقة ( الفي بطنو حرقص براهو بيرقص ) عقب زاوية الأمس التي سطرناها تحت إسم ( قبضنا خائن ) التي واصلنا فيها الحديث عن الغدر والخيانة التي تعرض لها المهندس حسام في إنتخابات اللجنة الأولمبية من أقرب الأقربين ورغم أنني لم أشير في هذه الزاوية الى أي إسم إلا أن صاحبنا تبرع بالرد عليها وأرسلها في الخاص وبما أن زمن ( الغتغتة والدسديس ) إنتهى فإنني أنشر رسائله التي أعتبرها بمثابة  حق رد باللنسبة له على ما سطرته في نفس الزاوية وأمنحه نفس  وسوف أرد على أكاديبه وإساءاته لاحقا ، إليكم نص الرسالة الأولى بدون أي حذف أو إضافة ( بعد السلام . يا طارق انا كنته متنشن وجنبي محمد الهادي بتكلم لمن انتبهتا للمنصة شفتا علامة الصاح بادية من الدائرة دافعتا وقايل انو علامة الصاح للحبيب حسام . وانا بقوليك كدا ما عشان حاجة بس لأني قريت كلامك اسي . وانا يا طارق ما بتهمني لجنة وانا ما غدرتا بي حسام ودليلي موجووووووود احمد الله تعالى انا صوتا لي حسام تصدق ما تصدق دا موضوع برجع ليك .. والله والله والله  لو كتبتا فيني ما كتبتا ما تهز شعرة من راسي .. لانك ما بتعرفني ولاقيتك بالعدد طوال اكثر من ٤ سنوات وانته الساكن في اللجنة ليل ونهار اكتر من خفيرا .. وانا ما في سبب اطعن حسام تعرف ليه لانو حسااااام راجل وصديق وانا ما حصل يوم رغم قربي منو لم اطلب حاجة لا سفر ولا منحة زيك .. وانا كنته من الداعمين لوجودك ايام محاربة هنادي الصديق لوجودك وقلتا نحنة ليس في حوجة لصحفي مهني ومشهور نحن في حوجة زول بيعرف يكتب ويقرا وبعرف الصحفين .. انته يا طارق زول مندفع ساي وعازرك انا .. وانته زعلان عشان مصالحك صاح يا ود اليابان .وغيابي كان لظروف مرض بتي المستمر لي فترات وانا خارج السودان وتاني لسفري المستمر ( على نفقتي الخاصة  ) للأعمال وأخيرا إصابة زوجتي وكنته في الخارج أيضا ووصلتا يوم الخميس ليلاً والجمعية يوم الثلاثاء . افهم يا الما داير تفهم وبعد داك تطرشق وانته حقيقي زول ضعييييييييف شديد وما عارف المطرة صابة وين . يا ود اليابان اخيرا ً انا معاااااااااااي دليل انو صوتا لي حسام ... وموجوووووود ... وممكن اشهر بيك بس انته وعمودك فقاعة كبيرة هههههههه عشان كدا انا ردت ليك بي مسج بس ما بتستحق اكتر من كدا . ويا ريت كوراكك وازعجك كان تعملوا لمن رجعو استاذ هاشم  هارون من المطار لكين انته كنته في كوكب  اليابان وبعد جيت سكتا لانك عارف حاجة نحنه عرفناها متاخر للأسف يا خائن .. الراجل عيان وانته سكتا على اكبر مؤامرة في تاريخ العمل الاولمبي ) إنتهت رسالة أبو طاقية الأولى كان ردي له  على رسالتة بثلاثة جمل هى 1 / أنت كذاب أشر 2 / كل إناء بما فيه ينضخ 3 / لو كل كلب ألقمته حجرا .. لأصبح الصخر مثقالا بدينار ،أبو طاقية  لم يقصر معي وباغتني برسالة أخرى سريعة فيها ما فيها من الإساءات لشخصي  هذا نصها  ( بضبانتا ) بدون حذف أو إضافة (ردي ليك *انا ماشي وانته هوهو * انته خايف على رزقك وانته راجل ضعيف بشهادة حتى الموظفين والرياضين وحتى الصحفين  . وانا لو مع محمود السر ١٠٠٠٪؜ ما برد بي عفوية في تاكيد علامة الصاح . انته قلمك اعوج وانته اعوج يا طارق لانك اكبر مطبل وكذاب .دافع عن الحق ما تدافع انو حسام مشى حسام حي يرزق وانته مفتكر رزقك معاهو ودا ياكد انو ايمانك برضو ضعيف . كزول في اعلام اللجنة ( وانته جابك الدرب كالكلب الضال ) كان تدافع عن الحجات الحصلت من الحكومة في حل للاتحادات وارجاع هاشم هارون من المطار لكين انته سكتة لانك جزء من المؤامرة . انا اشرف وأنقى منك شئت ام ابيت يا ارزقي يا مضلل .ختاما بلغة العرب (انته زي ضنب الماعز لا تهش ضبان لا تستر عورة ) إنتهت الرسالة الثانية ..راجع ليك بعدين  يا ( أبو طاقية ) .